ჩემპიონთა ლიგის მატჩის დღე: შარშანდელი ფინალის გამეორება და ქართველი ლეგიონერების რთული გამოცდა

ჩემპიონთა ლიგა დაგვიბრუნდა. დღეს ჩვენ გველის გასული სეზონის ფინალის გამეორება: მადრიდის რეალი - დორტმუნდის ბორუსია. ასევე დღეს თავის მატჩს ჩაატარებს სამივე ქართველი ლეგიონერი: გურამ კაშია, ოთარ კიტეიშვილი და ირაკლი აზაროვი.

რეალი - დორტმუნდი

როგორც აღვნიშნეთ, ეს გუნდები ერთმანეთს ჩემპიონთა ლიგის გასული სეზონის ფინალში შეხვდნენ. რეალმა 2:0 იმარჯვა და ტიტულს მე-15 დაეუფლა. ახალი სეზონისთვის ორივე გუნდში მოხდა გადანაცვლებები: მადრიდში მივიდა კილიან მბაპე, დორტმუნდში კი ედინ ტერზიჩის ნაცვლად დამრიგებლად ნური შაჰინი დაინიშნა.

თურქმა მწვრთნელმა ფეხბურთელობის დროს გაიბრწყინა სწორედ ბორუსიაში, შემდეგ კი გადავიდა "სამეფო კლუბში", სადაც მისი კარიერა ვერ აეწყო. ვესტფალიელთა ყოფილ ჩამშლელს ხელი შეუშალა ტრავმებმა კონკურენციამ და უნდობლობამ "ბლანკოსის" იმდროინდელი დამრიგებლის, ჟოზე მოურინიოს მხრიდან.

დღეს, 36 წლის მწვრთნელი სანტიაგო ბერნაბეუს ბინადრებზე რევანშიც აღებას ეცდება. ყურადღების ცენტრში ასევე იქნება ჯუდ ბელინგემიც, რომელიც შაჰინის მსგავსად, რეალში "შავ-ყვითლებიდან" გადავიდა. ინგლისელი გამთამაშებლის კარიერა ვითარდება ტრიუმფალურად, ის მსოფლიოს ერთ-ერთი საუკეთესო მოთამაშეა.

ქართველი ლეგიონერები

დღეს, მოედანზე ჩემპიონთა ლიგაზე მონაწილე სამივე ქართველ ლეგიონერს ვიხილავთ. კაშია ბრატისლავას სლოვანთან ერთად, ჟირონას ესტუმრება. სლოვაკური კლუბი 0 ქულითა და ბურთების ბალანსით 1:9, ტურნირის ერთ-ერთი მთავარი აუტსაიდერია. ქართველი უკანახაზელის გუნდზე ცუდი შედეგი ჯერჯერობით მხოლოდ იანგ ბოიზს აქვს.

თავად "ლურჯების" ცენტრალური მცველი შესანიშნავ ფორმაშია და ის სლოვაკეთის ჩემპიონატის გასულ ტურში სიმბოლურ გუნდშიც მოხვდა. კიტეიშვილის შტურმ გრაცი საკუთარ კედლებში ლისაბონის სპორტინგს მიიღებს. წარმატებული უიკენდი გამოუვიდა მასაც, გრაცერის კარში შესრულებული დუბლი ამის ნათელი მტკიცებულებაა.

ქართველ ნახევარმცველს "ლომების" წინააღმდეგ თამაშის გამოცდილება უკვე აქვს - ევროპა ლიგის გასული სეზონის ჯგუფურ ეტაპზე, ავსტრიულმა გუნდმა წააგო ორივე მატჩი, თავად ოთარმა კი "თეთრ-მწვანეებთან" ასისტი გაიფორმა. ვნახოთ, რას იზამს ის დღეს თავისი გუნდისთვის, რომელსაც ამ დროისთვის 0 ქულა აქვს.

ყველაზე რთული გამოცდა ელის აზაროვს - დონეცკის შახტარი ლონდონის არსენალს ესტუმრება. მისი გუნდი ერთი ქულით ასევე აუტსაიდერებს შორის არის. ალბათ ყველასთვის გასაგებია, თუ ვინ არის ამ მატჩში ფავორიტი, უბრალოდ იმედი დავიტოვოთ, რომ ქართველი განაპირა მცველი მოედანზე იქნება და წარმატებულად ითამაშებს.