ჩემპიონთა ლიგის მატჩის დღე: ალონსოსა და არტეტას ტკბილი მოგონებები, კაშია-ჰოლანდის წინააღმდეგ

ჩემპიონთა ლიგის მეორე ტური არაერთი საინტერესო დაპირისპირებით გვიბრუნდება. განვიხილოთ, თუ რას გვიმზადებს სამშაბათის მატჩის დღე.

არსენალი V პარის სენ-ჟერმენი

შეხვედრა, რომელიც მიკელ არტეტასთვის განსაკუთრებულია. როგორც ვიცით, ის ბარსელონას აღზრდილია, თუმცა დიდ ფეხბურთში პირველი ნაბიჯები ყოფილმა ესპანელმა გამთამაშებელმა პარის სენ-ჟერმენში გადადგა. საფრანგეთში მან ჩაატარა 53 მატჩი, რომელშიც 5 ბურთი გაიტანა. ის დღემდე თბილად იხსენებს პსჟ-ში გატარებულ პერიოდს.

ცნობისთვის, ორი წლის წინ, პარიზელები აქტიურად ცდილობდნენ თავიანთი ყოფილი ნახევარმცველის გადმობირებას უკვე მწვრთნელის რანგში, თუმცა მან არსენალში დარჩენა გადაწყვიტა. "ლურჯ-წითლებში" ლუის ენრიკე მივიდა, რომელთანაც 42 წლის სპეციალისტს ასევე ძალიან ბევრი მოგონება აკავშირებს.

როდესაც არტეტა დიდი ფეხბურთისთვის ემზადებოდა ლა მასიაში, კატალონიელების მთავარ გუნდში სწორედ მისი თანამემამულე ფორვარდი ბრწყინავდა. დღეს, ისინი ერთმანეთის პირისპირ წარდგებიან. რაც შეეხება გუნდების ამჟამინდელ მდგომარეობას, ლონდონელებმა უგოლო ფრე ითამაშეს ბერგამოს ატალანტასთან, ენრიკეს გუნდმა კი მინიმალური ანგარიშით ჟირონას მოუგო.

შიდა ჩემპიონატი - "მეთოფეები" საჩემპიონო რბოლაში არიან და სატურნირო ცხრილის ლიდერ ლივერპულს ამ დროისთვის ერთი ქულით ჩამორჩებიან. პარკ დე პრენსის ბინადრები კი ლიგა 1-ში ლიდერობას მონაკოსთან ერთად იყოფენ. რაც შეეხება დანაკლისს, "კანონირებს" არ ეყოლებათ მარტინ ოდეგორი, ალექსანდრ ზინჩენკო, რიკი კალაფიორი, მიკელ მერინო, ტაკეჰირო ტომიასუ და ბენ უაიტი.

პარის სენ-ჟერმენს კი ვერ დაეხმარებიან პრესნელ კიმპემბე, ლუკას ერნანდესი და გონსალუ რამოში. ბოლოს კი ურთიერთშეხვედრების ისტორიაც გავიხსენოთ - ოთხი მატჩი, ერთხელ მოიგეს ემირეიტსის ბინადრებმა, სამი თამაში კი ფრედ დასრულდა. ამ გუნდების ბოლო დაპირისპირება შედგა 8 წლის წინ, ჯგუფურ ეტაპზე.

ლევერკუზენი V მილანი

კიდევ ერთი ცენტრალური შეხვედრა - კრიზისში მყოფი მილანი ბუნდესლიგის მოქმედ ჩემპიონს, ლევერკუზენს ესტუმრება. მასპინძლების ამჟამინდელ მწვრთნელს, ჩაბი ალონსოს "როსონერისთან" თავისი კარიერის ერთ-ერთი ყველაზე დიდი წარმატება აკავშირებს: ჩემპიონთა ლიგის ფინალის მოგება, სტამბოლში, 2005 წელს.

როგორც გვახსოვს, "შავ-წითლები" პირველი ტაიმის ბოლოსთვის ლივერპულს ანადგურებდნენ ანგარიშით 3:0-ს, თუმცა მეორე ნახევარში მოწინააღმდეგემ "ქამბექი" შეასრულა. "ეშმაკების" კარში "წითლების" მხრიდან მე-3 ბურთი სწორედ ესპანელმა შუახაზელმა გაიტანა. დღეს, ის ნაცნობ მეტოქეს უკვე სპეციალისტის რანგში უპირისპირდება.

რაც შეეხება გუნდების ამჟამინდელ მდგომარეობას, უმძიმესი სტარტის შემდეგ, სან სიროს ბინადრებმა გამარჯვება მოიპოვეს ზედიზედ სამ შეხვედრაში, მათ შორის მეზობელ ინტერთანაც. დღეს, პაულუ ფონსეკას გუნდი სერია ა-ს სატურნირო ცხრილში მე-3 პოზიციაზე არის. ასევე, წარუმატებელი იყო ჩემპიონთა ლიგაზე სტარტიც: სახლში 1:3 წაგება მერსისაიდელებთან.

ბაიერის დაუმარცხებელი სერია უკვე დიდი ხანია, რაც წარსულს ჩაბარდა. ახლა ეს გუნდი ბუნდესლიგაში 10 ქულით მეოთხე ადგილზეა და ლიდერ მიუნხენის ბაიერნს სამი ქულით ჩამორჩება. მილანისგან განსხვავებით, "ფარმაცევტებმა" ევროსეზონი წარმატებულად დაიწყეს: გასვლაზე როტერდამის ფეიენოორდს გამანადგურებელი შედეგით სძლიეს, 4:0.

"როსონერის" დღეს დააკლდებიან დავიდე კალაბრია, ისმაელ ბენასერი, ნოა ოკაფორი, კევინ ძეროლი, მალიკ ტიაუ და მარკო სპორტიელო. "ლომები" დანაკლისის გარეშე ითამაშებენ. აღსანიშნავია ის ფაქტიც, რომ "შავ-წითლები" და ბაიარენას ბინადრები აქამდე ერთმანეთს არასდროს შეხვედრილან.

სლოვანი V მანჩესტერ სიტი

არ შეგვიძლია გურამ კაშიას უყურადღებოდ დატოვებაც, რომლის სლოვანს სიტი ესტუმრება. ვეტერანი ცენტრალური მცველი ევროპის ერთ-ერთ საუკეთესო შემტევებს დაუპირისპირდება. პირველ რიგში, გამოსარჩევია ერლინგ ჰოლანდი, რომლის წინააღმდეგ თამაშის გამოცდილება ქართველ უკანახაზელს უკვე აქვს.

ეს მოხდა გასულ წელს, ევროპის ჩემპიონატის საკვალიფიკაციო ეტაპზე, როდესაც საქართველოს ნაკრები სტუმრად ნორვეგიის ეროვნულ გუნდთან დამარცხდა. ცნობისთვის, 1-ელი ბურთი "ჯვაროსნებს" სწორედ მანჩესტერელთა ფორვარდმა გაუტანა. ვნახოთ, როგორ გაუმკლავდება ბრატისლაველთა უკანახაზელი ნორვეგიელ შემტევს ამჯერად ჩემპიონთა ლიგაზე.